माजि ज़्यॆवि ऱवख डोल असि कऻशर्यव
मऻज्य दपान बब्लिस अंग्रीज़स ल्यव
क्याह न्येरी ह्यॆछतॖय कऻशिर ज़्यव
यथ ज़बऻन्य मंज़ ज़ामुत छुख च़ॖय
तऺथ्य ज़बऻन्य हॖन्ज़ क्याज़ि गऻमॖच़ दॖय
कऺम्य फरऺन्ग्य कॊरनय कनस तल म्यव
माजि ज़्यॆवि ऱवख डोल असि कऻशर्यव
पर ज़बान वऺन्य वऺन्य डऺज्य असि चाल
बासान नऻल्य शालस सॖह खाल
प्यठॖ गॊन्ड दस्तारॖ अंग्रेज़व
माजि ज़्यॆवि ऱवख डोल असि कऻशर्यव
प्रोमिलायि वॊनुम वलॖ कऻशुर पर
कनॖ डोल द्युतुन दॊपुन ब्यॆयि कॆंह कर
कऻशुर वुछतॖय ज़न प्यवान द्यव
माजि ज़्यॆवि ऱवख डोल असि कऻशर्यव
असि ॴस कऺशीरी छ़ठ लऺज्यमॖच़
कऻशिर्य पऻठ्य कथ करॖन्य ॴस मऺठमॖच़
योर यिथ पर ज़्बऻन्य हुर्यर सपद्यव
माजि ज़्यॆवि ऱवख डोल असि कऻशर्यव
कऻशिरिस प्रुछ़ुख च़ॖ कमि ज़ऻच़ हुन्द
फखॖरॖ सान वॊनॖनख छुस कशीरि हुन्द
कऻशिर कथ प्रछ़हऻस सु तऺती ज़रद्यव
माजि ज़्यॆवि ऱवख डोल असि कऻशर्यव
शुर छुय कऻशिर कथ करनावुन
परनावुन ब्यॆयि ल्यॆखनावुन
तवॖ पतॖ वन तस कऻशिर्य बऻथ ग्यव
माजि ज़्यॆवि ऱवख डोल असि कऻशर्यव
माजि ज़्यव ह्यॆछि शुर गरसॖय मंज़
न्यॆबरॖ ह्यॆछनावनुक काह नॖ तस संज़
यॆम्य नॖ ह्यॊछ गरि पतॖ सु ना वॊतल्यव
माजि ज़्यॆवि ऱवख डोल असि कऻशर्यव
स्कूलन मंज़ गछ़ि आसुन कऻशुर
त्यॆलि ह्यॆछि ल्यॆखुन परुन सोन शुर
ॴयीनस मंज़ छि मऻनिथ यि ज़्यव
माजि ज़्यॆवि ऱवख डोल असि कऻशर्यव
माजि ज़्यॆवि मंज़ छुय पनुन मेछर
हावान बावान अंदरिम कल्चर
प्रज़नथ यस रऻव सुय हा वुड्यव
माजि ज़्यॆवि ऱवख डोल असि कऻशर्यव
असि ना तऺग्य पनॖन्य चीज़ रऺछ़रावॖन्य
रसॖ रसॖ ह्यॆतिन ॳस्य पानॖ रावॖन्य
नाजऻयिज़ फऻयदॖ तुल सान्यव परद्यव
माजि ज़्यॆवि ऱवख डोल असि कऻशर्यव
यि वनन गऺयि असि व्वंय खान्दॖरन
जय माल नऻल्य त्रावान वांदरन
ज़ाथ रावॖरऻव शुर्यव पनॖन्यव
माजि ज़्यॆवि ऱवख डोल असि कऻशर्यव
गरन मंज़ पर ज़्यॆवि तुल व्वथॖवार
अख वनान सनडे ब्याख आथवार
शुर ति गव पज़ॖल छ़ान्डान माजि ज़्यव
माजि ज़्यॆवि ऱवख डोल असि कऻशर्यव
हशि ह्यॊत टंगुक नाव न्वशि हऻव टंग
वुछिथॖय हशि गव रंगस बेरंग
बऻयलालॖ ज़न आसमानॖ प्यठॖ प्यव
माजि ज़्यॆवि ऱवख डोल असि कऻशर्यव
कति रूज़ कऻनी कति व्वंंय वॊट
च़लॖ लारि आयि ओस कॖस्मत खॊट
सोन जायदाद तति ख्यव होन्यव
माजि ज़्यॆवि ऱवख डोल असि कऻशर्यव
हरफ च़ोर शुर्य परान छिय तुलान दव
व्यलायथ वऻतिथ सु ततिकुय गव
दीपस वुनि दज़ान यॆतिकुय ग्यवं
माजि ज़्यॆवि ऱवख डोल असि कऻशर्यव
भूषण कौल “दीप'”
