सोंचान छुस बॖ खारॖ कस तक़्सीर
शायद अथॖ गऺयि नीरिथ कऺशीर
कस डॊल यि ईमान कस गॊल ज़मीर
दावस लोगुन सोन तक़्दीर
ओसुस शॊंगिथॖय मच़ि न्यॆन्दर्ये
कऺम्य च़्वय कऺर यि ॳन्दॖर्य ॳन्दर्ये
कुस आव कति प्यठॖ कऺम्य दिच़ ज़ीर
ननि-तनि छॆचिनम ख़ूनॖच लऺकीर
सोंचान छुस बॖ…
गरि कॊडनस बॖ परि आस ह्यनय
शबॖनम प्यव गुलन कलॖ कडनय
फऺक्य गऺयि म्यऻन्य सऻरी तदबीर
ख़ोफ़ज़द गव नुन्दॖ ऋश्य तॖ ऋशि-पीर
सोंचान छुस …
थरॖ थरॖ च़ायि तति पनॖवऺथरन
यलॖ गऺयि दऺर्याव लोलॖ चॆशमन
ब्यॆनि रोव बोय तय माजि रोव वीर
वॊथ क़हर जन्नतस युस ओस बॆनऺज़ीर
सोंचान छुस….
ओस युस सतीसर ॴस ऋश्य-वऻर
फ्युर द्युत समयन बन्येयि चान्दमऻर
छ्यॆलि छ्यॆलि प्यव महल डऺज्य अथ सीर
म्यूल तस क्याह यॆम्य डऻज्य तस्वीर
सोंचान छुस बॖ….
मऺत्य-अक़्लि अज़ताम थऺकॖरऻव्य ॳस्य
वावॖ-छ़टि ॴखरश छऺक्कॖरऻव्य ॳस्य
प्रथ ॳकिस वुन्यक्यनस रऻव्यमॖत्य तीर
च़ुवऺतिस प्यठ ॳस्य प्येमॖत्य बे-पीर
सोंचान छुस बॖ….
कुस वायि घन्टा मंदरन मंज़
कुस करि वापस गछ़नुक संज़
कुस त्रावि “दीपस” सॊयथ तॖ तील
कुस बावि कऺमिस व्वंय ॳन्दरिम सीर
सोंचान छुस बॖ
सोंचान छुस बॖ खारॖ कस तक़्सीर
शायद अथॖ गऺयि नीरिथ कऺशीर
भूषण कौल “दीप”
