Feature StoriesKashmiri Write Up'sTrending Photo
बॖ छस ललॖद्यद बॖ छस बटॖ कूर,बॖ असॖस हूर मॆ रोवुम होश मॆ तॖनि छम रेह दज़ान कोंगॖ डूर,बॖ असॖस हूर मॆ रोवुम होश।।।।।।।।।
बॖ छस ललॖद्यद बॖ छस बटॖ कूर,बॖ असॖस हूर मॆ रोवुम होश
मॆ तॖनि छम रेह दज़ान कोंगॖ डूर,बॖ असॖस हूर मॆ रोवुम होश।।।।।।।।।
मॆ लॆम्बि पम्पोश डलस खॅरिम,गथय यॆन्द्रिनॖ पनस तॉरिम
मॆ कति वॖरिव बॖ कतचिय कूर।
बॖ असॖस हूर मॆ।।।।।।।।
हंगस तरंगय चंद्र प्रज़लान,छु पोशि डेजिहोर गज़ॖल वखनान
कनन ओमकारकुय स्वनॖ दूर।
बॖ असॖस हूर मॆ।।।।।।।
नागॖ जय्यव स्वनॖ साज़ मॆ गॗर, मॆ मा ज़ाह हॅल अछ़र तति पॅर्
अज़ॖल वरलद वुठिथ दछि मूर।
बॖ असॖस हूर मॆ।।।।।।।।।
मॆ ग्ंयुंद तति बोनि शॆहजारस,बुज़ुम येति पान तुलिनारस
कथ स्वनॖ वारि गव मेच़ि टूर।
बॖ असॖस हूर मॆ।।।।।।।।।।।
गहे लालस वंदस कोछि मंज,गहे हारन करूम यॆति क्रंज
मॆ गव कथ ऑनॖखानस चूर।
बॖ असॖस हूर मॆ।।।।।।।।।
कॅतिज नालान दॅज़िथ पनॖपॗर, दिवान छा वॅन वुनि वनॖहाॅर
वुछिथ सूरा वदान कस्तूर।
बॖ असॖस हूर मॆ।।।।।।।।।।।
मॆ ऑस स्यज़रॅच तॖ पज़रॖच लय,खॅटिथ कथ जायि रूदुम दय
मॆ रॉविम लय गयस मजबूर।
बॖ असॖस हूर मॆ।।।।।।।।।
बॖ असिॖस अछवलिच अछि दाॅर,करान रॆम्बय आरॖनॖय मंज साॅर
मॆ रॊव यावुन फरिथ गव चूर।
बॖ असॖस हूर मॆ।।।।।।।।।।
मॆ असॖम गणशिबलचिय लय,”निराशुन” लॊब मॆ ततिनिय पय
जुदा गॅय अख अकिस निश दूर।
बॖ असॖस हूर मॆ ।।।।।।।।।।।
डा रमेश “निराश”
