ज़ीरॖ बमकुय सीर खॊट मारॖ मतिये,लतिये आगुर अथि नय आव शीरॖ रोस प्यालन चीरॖ नालमतिये,लतिये आगुर अथि नय आव

November 9, 2024

0 332 Less than a minute

ज़ीरॖ बमकुय सीर खॊट मारॖ मतिये,लतिये आगुर अथि नय आव

शीरॖ रोस प्यालन चीरॖ नालमतिये,लतिये आगुर अथि नय आव

लफ़ज़व रव्ख फुर्य अंबरस खॅसथॖय,न्यच़ॖथॖय हंगमंगि नंगॖ पान गोम

दावस हावस लॉग आरकतिये,लतिये आगुर अथि नय आव

रिंदॖ फॉलसॖय गिंदुनम टिकॖ तारन,गोफनॖय गारन छेफ़ दिथ ब्यूठ

थफ़ दिच़ अॕलमन नेंद्रे हतिये,लतिये आगुर अथि नय आव

तरकश तीरव तोरॖ ओस बॉरिथिय,फॉरथिय येति गव कुस अबक छान

तानॖ तानॖ कोरनस छानॖ कॅजि येतिये,लतिये आगुर अथि नय आव

खॊंदलद समयन कॊंदि पोखतोवुस,रोवुस वुछथॖय सूरस ति सास

ज़ायि गय ज़ालेव मॊखतय फतिये,लतिये आगुर अथि नय आव

रंगरेजन रंग थोव कुस च़ूरे,युस नॖ कोसतूरे अथि ज़ाह आव

रंगॖ रंगॗ बेरंग-रंग कॉत छतिये,लतिये आगुर अथि नय आव

रोनिगोडॗ श्रोंनवॖय मन ब्रमरोवुम,सर्पन अथि बुछनोवुम पान

आछुर रूदुम येति कॉत कतिये, लतिये आगुर अथि नय आव

मॅत आब वोथमुत शहरि शीराज़य,छ़ेफ दिथ कति येंद्राज़य ब्यूठ

बंदॖ मॊर फंदवॖय वॊन निराश मतिये,लतिये आगुर अथि नय आव।