Feature StoriesKashmiri Write Up's
हर हर पॅरतव पूज़ा छि हरसॖय,नंदकीश्वरसॖय जय जयकार। गुलगाम विलगाम सुंबलेश्वरसॖय,नंदकीश्वरसॖय जय जयकार
डॉ रमेश निराश
*आप सभी को मावस की हार्दिक शुभकामनाएं*
हर हर पॅरतव पूज़ा छि हरसॖय,नंदकीश्वरसॖय जय जयकार।
गुलगाम विलगाम सुंबलेश्वरसॖय,नंदकीश्वरसॖय जय जयकार
नीलनाग धारनायॖ ध्यान च्योन धारय सीर जागीरय यिमॖ लारान
बावॖ पोश तति लागॖ परमेश्वरसॖय,नंदकीश्वरसॖय जय जयकार
शर छुम जिगरस दर्शुन हावुम,वर दिम ज्ञानुक संतान च्योन
तॉर मुच़रावुम खयलद बरसॖय,नंदकीश्वरसॖय जय जयकार
ज्ञानुक अमृत वुज़नाव नागस,हरदन बागस कॊर लुरपार
लॉरॖथ वुनॖ छुस मुहकॖस ज़रसॖय,नंदकीश्वरसॖय जय जयकार
अथॖछ्योन खॉली चंदवॖय आमुत,द्रामुत घरि छुस बॖय ननवोर
खुरकस शुरसुय लजॖ अछ दरसॖय,नंदकीश्वरसॖय जय जयकार
ज़प तप यज्ञनस पोश पूज़ाये,प्रथ कुनि जाये च्योन अंहार
हलमव हलमव पोश पूज़ करसॖय,नंदकीश्वरसॖय जय जयकार
ओन छुस नोन मा ज़ाह अथि आवुम,करनावुम वन साक्षात्कार
प्रारान छुसना च्यनॖस वरसॖय,नंदकीश्वरसॖय जय जयकार
हेस दिम सीरन छुखना सरपोश,लेंबॖ मंज़ फॅलरवतम पम्पोश
चेय रोस तारि कुस भवसागरसॖय,नंदकीश्वरसॖय जय जयकार
भॅरव ब्रमसर गोति करनावतम,दामॖदामॖ चावतम ज्ञानुक मॉय
अखिर गछ़नुय पननिस गरसॖय,नंदकीश्वरसॖय जय जयकार
शरणागतसॖय अज़लुक वर छुम,दर दर फेरान सोन दरियाव
हमरोस नम कुस रटि येथ सरसॖय,नंदकीश्वरसॖय जय जयकार
कल छम चॉनॖय छ़ल मतॖ करतम,वरतम पन्ने ज्ञानय सीथ।
निराश गोमुत प्रारान वरसॖय,नंदकीश्वरसॖय जय जयकार
नमन माहर
डाॕ रमेश निराश
