Feature StoriesKashmiri Write Up'sTrending Photo
दयॖ सुंद पय छुय अथ स्वरॖनय मंज़ नय नच़नावन वाॅलयो।
दयॖ सुंद पय छुय अथ स्वरॖनय मंज़
नय नच़नावन वाॅलयो।
रासिकॆ रंगि आय राधा रंगॖनय
रास गिंदनावन वाॅलयो।।।।।
सतॖनॖय स्वरनॖय अठिम प्रवि पॆय
अॕठम दॊह अंगटि मंज़ ज़ाव
दारि बर वॉथ गय कुलफॖय यलि गय
कुंज़ि गिदनावन व्यालो।।
दयॖ सुंद पय छुय अथ,,,,,,,,,,,,,,,,,,,,,,,
कंसुन काल आख क्रॅशनॖय बनॖथिय
कॉलीनागस करूथुय व्योदार
शशिपाल अॕखिर वती वातनॊवथन
पॉज़ वथ हावन व्यालो।।
दयॖ सुंद पय छुय अथ,,,,,,,,,,,,,,,,,,,,,,,
यमुनायि पादन मीॖठ कॅर कृष्णस
कामधीनन लॅज दोॊदसिय धार
रॊनि मंजलिस गॊव रति मंज़ श्रॊन श्रॊन
लय वुज़नावन व्यालो।।
दयॖ सुंद पय छुय अथ,,,,,,,,,,,,,,,,,,,,,,,
गॊकुल धामय हूल तुल विगिनॆव
ज़ूल प्रखटॆव आव पानि भगवान
ज़ॅग बनिथिय शिव आव दर्शनसिय
यूग हॆछिनावन व्यालो।।
दयॖ सुंद पय छुय अथ,,,,,,,,,,,,,,,,,,,,,,,
ज्ञानुक करमुक ब्यॊला वविथिय
लॊलकुय तति बीज मंत्र द्राव,
अर्जन दीवस दिव्य दर्शन दिथ
गीता बावन व्यालो।।
दयॖ सुंद पय छुय अथ,,,,,,,,,,,,,,,,,,,,,,,
पॊज़ तॖ अपज़ुय पॅरिनिस छ्यनिथ
ज़ॉनिथ ग्रटसिय मॏछि 2 त्राव।
राधा स्वरनुय छु भवसर तरनुय
यछ पछ थावन व्यालो।।।
दयॖ सुंद पय छुय अथ,,,,,,,,,,,,,,,,,,,,,,,
पनि पारॆन गॊव सोंनि सुंद मॅहलिय
सॅहलिय स्वरनुय छा दय नाव
भाव सॊदामुन सनुनॖय मनसिय
सॊनमोख प्रावन वालों।।।
दयॖ सुंद पय छुय अथ,,,,,,,,,,,,,,,,,,,,,,,
अरदाह अध्याय गीता वखनिन
शुराह कला सम्पूर्ण दय
कलियॊगस मंज़ आश “निराशस”
गटि गाह त्रावन व्यालो।।।।
दयॖ सुंद पय छुय अथ,,,,,,,,,,,,,,,,,,,,,,,
डाॅ रमेश निराश
