आश बबॖ च्यनिय गाश हावुम,सतचे वति पेठ में पकनावुम आमॅत हलम दॅर दॉरये,सत् गॊरॖ बॊज़तम में ज़ॉरिये
गॊर पादन लगय ब पॅरये,सत् गॊरॖ बॊज़तम में ज़ॉरिये
बाव पोश लागॗ च़ॅर च़ॉरये,सत् गॊरॖ बॊज़तम में ज़ॉरिये
सद्गुरु सत्यचिय वथ में हावुम,कष्टॖन ज़ालय में मोकलावुम।
गांगल गयम छॅर छ़ॉरये,सत् गॊरॖ बॊज़तम में ज़ॉरिये
मन किस मंदरस खय में च़ॅलराव,अथरोट करतम दॅद बॉलराव
पाप शाप बखचुम में सॉरिये,सत् गॊरॖ बॊज़तम में ज़ॉरिये
आश बबॖ च्यनिय गाश हावुम,सतचे वति पेठ में पकनावुम
आमॅत हलम दॅर दॉरये,सत् गॊरॖ बॊज़तम में ज़ॉरिये
वनॖ कस वननस वार मा छुम,अज़लय हॅज कॅज द्रामॖच़ में सुम।
बरनेन में मुच़राव तॉरये,सत् गॊरॖ बॊज़तम में ज़ॉरिये
च़ेय रोस तारि कुस में संसारस,डेडि तल बिहथॖय ब ज़ारपारस।
वनतम कर छ म्यन वॅरिये,सत् गॊरॖ बॊज़तम में ज़ॉरिये
सादन हिंदे सादॖ मस्तानय,ज़ार बॊज़तम जानि जानानय
कासतम गम तय खॅरिये,सत् गॊरॖ बॊज़तम में ज़ॉरिये
बेबस बेकस संतान च्योन,कोनि छुख बोज़ान फरियाद म्योन
दोरान आयि ननवॉरिये,सत् गॊरॖ बॊज़तम में ज़ॉरिये
सतसंगकुय बबॖ मय में चावुम,शिवॖ शीवॖ हर-हर परनावुम।
अदि देव च़लेम यि बेमॆरये,सत् गॊरॖ बॊज़तम में ज़ॉरिये
आफ़ताब बबसॖय माहताब वनि क्या,ज़ानान सॊरूय सीरॖय सोन
कर यियि निराशस वॉरये,सत् गॊरॖ बॊज़तम में ज़ॉरिये
डाॅ रमेश निराश
