Feature StoriesKashmiri Write Up'sTrending Photo
कू कू करान कुकिलाह बागस,द्यव नागस पॊन्य वुजहे म्युल गछ़िहे दॖयि अनुरागस,द्यवॖ नागस पॊन्य् वुज़िहे।
कू कू करान कुकिलाह बागस,द्यव नागस पॊन्य वुजहे
म्युल गछ़िहे दॖयि अनुरागस,द्यवॖ नागस पॊन्य् वुज़िहे।।०।।
द्रह ड्यकॖसॖय छेन परमानय संग त्रकरे खॊट ब्यापार
लॊलॖ बुलबुल द्राव वॅ रागस द्यवॖ नागस पॊन्य वुजहे।।०।।
गय वुज़मलॖ ज़ून ऒश त्रावान, गगॖरायव तुल गटॖकार
लयि शाहमार थवनुय बागस द्यवॖ नागस पॊन्य वुजहे।।०।।
कॊल काला शेछ ह्यथ छु द्रामुत,कावॖ कावय वलॖसनस आव।
रॆह सॊम थव हारस तॖ मागस द्यवॖ नागस पॊन्य वुजहे।।०।।
हाॅन्ठ हूराह दॊद क्रूठ वखनान,लंजि गाॅन्ठाह छस करान वाव।
कावॖ हांडॖल्यो वुफि़ गछ़ काबस द्यवॖ नागस पॊन्य वुजहे।।०।।
वॅथिर अदॖरिय लेखि क्या साहेब,राज़ॖ बॊन्यन द्वदरेर चाव।
कर यकसान दॊदस तॖ आबस द्यवॖ नागस पॊन्य वुजहे।।०।।
हामि बेरन ब्योल ओस खामय,रंगवारि रॊव म्वखतॖ अनॖहार।
ठरि थव केंह अथ सॅहलाबस द्यवॖ नागस पॊन्य वुजहे।।०।।
ग्रटॖ फॆरि ज़ॆरि हाॅंकल मुच़ॖराव,परदि व्यथ त्राव व्यॅन”निराशो”
रठ च़ चीरिथ तारि रबाबस द्यवॖ नागस पॊन्य वुजहे।।०।।
डा रमेश “निराश”
