बोनि शेहजारस तल
त्रावहऻ बॖ न्यॆन्दरे ज़्वल
गनेयम कऺशीरि हॖन्ज़ कल
वुछॖहऻ बॖ ब्यॆयि जीलॖ डल
छ़्यनॖ यनॖ गऺयि छ़्यॆयि पश
कोरि रऻव मऻज,न्वशि हश
अरमानन गऺयि छलॖ-छल
बोनि शेहजारस तल…
रंगॖ महल असि त्रऻव्य
खॗमॖ-ज़चि यॆति असि प्रऻव्य
ह्यनॖ आयि लऺग्य ॳस्य तल
बोनि शेहजारस तल
पॊतकुन प्यव म्यूठ ख़वाब
सॗत्य रूद बस अख ताब
पतॖ खय तॖ ब्रोंठॖ दल-दल
बोनि शेहजारस तल
गरॖ तय गाम अथॖ गव
बहारस डोठ ज़न प्यव
गुल गऺल्य ऒबरस तल
बोनि शेहजारस तल
द्वख-दाद्यव सॗत मूद्य
ॴस्य कॗत्य कऺच़ताम रूद्य
कॊत ताम ब्यॆयि यि कर्तल
बोनि शेहजारस तल
प्रथ ब्रसवारि ज़्यीठयऻर
बासान ॴस ऋश्य-वऻर
कस खॊर यि गऺयि गांगल
बोनि शेहजारस तल
प्रथ ॴठम तुलॖमुल
रोज़ान ओस शोरो-गुल
कॊर रऻज्ञन्यायि असि छ़ल
बोनि शेहजारस तल
ॳसिथ म्योन गव चोन
फीरिथ म्यॆ गव कर्मॖलोन
बूगान छुस बॖ कर्मॖफल
बोनि शेहजारस तल
म्यूलमुत यि शाप व्वंय गलि
गटॖ च़लि तॖ गाश ब्यॆयि फ्वलि
नेरि अदॖ मसलन हल
बोनि शेहजारस तल
नेरि व्वंय कांह कुल-दीप
कासि युस सऻनी व्यॆक्षीप
मेलि स्वख शऻन्ति तॖ बल
बोनि शेहजारस तल
बोनि शेहजारस तल
त्रावहऻ बॖ न्यॆन्दरे ज़्वल
भूषण कौल “दीप”
