विस्थापन के बत्तीस साल बाद भी

दीवी आंगॖनच सॊ बादाम फुलया,
बाछि बरॖनि अॅच़िथॅय गणेश विहारा
तडॖपान छस करहस प्रकॖरम बार बार
वुह्येम अज़ दिलस बॆयि त्योंगल नार
च़ॆतस प्यॊम बॆयि अज़ पॖनुन गॖरबार।
दॉछ गाम,निशात,हॉरवन तॖ शालमार,
छावुन सुबॖह शाम शुहुल शेहजार,
व्वखुर लॊगुम जिगरस तॖछुन बिसियार
वुहृयोम अज़ दिलस बेयि त्योंगल नार।
स्वप्न अंदर टॅठय् दर्दिल यिवान छिम,
चॅलिवॖ कोर त्रॅविथ कुन्य् असि प्रुछ़ान छिम
त्रेशि हॅत्य् तिम छिम करान विलॖज़ार
वुह्येम अज़ दिलस बेयि त्योंगल नार।
ललॖदॆद्य रव्पॖदॆय्द तय अॅरिनिमाल तॅतिये,
छॅम प्रुछ़ान नियाज़ सॉन्य् छिवॖ कॅतिये,
थपि नीहम अरॖज़थ छ्वकन बुलॖगार
वुह्योम अज़ दिलस बेयि त्योंगल नार।
दॊयत्रह वॅरियॖ गॅयि वतॖ वॉलॉय गॅमॗत्य
गरॖ रावुन असि स्यठा क्रूठ प्योमुत,
बिमलाई प्रज़नथ छ़ांडान गव पुचॖपार
वुह्योम अज़ दिलस बॆयि त्योंगल नार
च़ॆतस प्योम बॆयि अज़ प्रोन गरॖबार
सो च़लॖलार सो सुय त्योंगल नार,
येलि बट्टन कॖशीरि च़लॖनॅच पॆयि लार।

बिमला मिसरी ऐमा
विस्थापन के बत्तीस साल बाद भी