Feature StoriesKashmiri Write Up'sTrending Photo
टेछ़र रिशतन हुंद करां दोतॖ दॊतॖ दारि परदॖन वदां बर दॊदरयोवमुत अज़ तस छु वरदन कुंज़ि रोस कुलफुस अडकॅज ज़ेव छ गमिच़ अलमन वुज़चेन दूंछ़ दिथ फुतॖफुतॖ छु गोमुत।
टेछ़र रिशतन हुंद करां दोतॖ दॊतॖ दारि परदॖन
वदां बर दॊदरयोवमुत अज़ तस छु वरदन
कुंज़ि रोस कुलफुस अडकॅज ज़ेव छ गमिच़
अलमन वुज़चेन दूंछ़ दिथ फुतॖफुतॖ छु गोमुत।
स्यठा काॅल पतॖ समॖथ अज़ गरॖक बॉच़ छि सॉरिय।
तवय कावव टावि टावय डबि चिरगुश छु तुलमुत
वसियत बाबस छ लेखॖन,ठोकुर कुठ दमफॅट अंद्रिय
वुछिथ तुलत्राव तवय यि ताखुच छु कॉर नेमरिथ
पतिज बेवा,मसतॖ तेहजन खॗंज़िथ डोंब छुस द्रामुत
वखुल रतॖदॅव काजिवठॖ सीथ च़ीटिथ पनिन गर्दन
गोतन तिलिवॉर कस हिसस यियि यि वजूद म्योनुय
चंगॖजि तिरपचि वुछिथ वदान सतरंजि हुंद कबीलॖ क्रोनुय
ज़जीर दमफॉट चिलमि तेंगुलस छुनि कितॗ कॖति ति गछां।
कतिज नालान गुपन गानस मंज वॉछ़ सिंज टांगि बूजिथ
कोकिर तछां होखमितन बोनि गोगरेन मंज गगराय बूज़िथ
कावि ठूलन सतुत दिगव यि कुस त्रटबुज़ुन छु तुलमुत
पोशिनूलव प्राण छेपि दिथ वोन विरकिनेन त टेंकिबटनन
नरगिसव सुंबलव त्रोमुत फोलुन येबरि त बोबरन नच़ुन
अॕन सुंद लमस तल छरुन क्या यि वुछना पजिय कंसिय
द्रोत दुय्न मूलन,कनन फंब बरिथ,अछन पॅट गंडिथ सॅरिय
च़रि आलेन मंज़ रातमोंगलन गॅँटन त ग्रदेन हिंज़ बसती।
सॉदरस जिगर दोदमुत वुछित त्रेशि हच़ि गाडन हिंज़ छृटि
अमा सना यि कुस वुनितॖ हिंद च़ंग ज़ॉलिथ दोहलिय
रतॗदॅव ज़ख्मन मोहब्ब्तुक मलहम मलिथ ओश त्रावान
बासान निराश बेयि छु द्रामुत ढोल नॉल त्रविथ हटिस मंज़
मोहबतकॖ कलमय त्रुस दिथ छ़ारान दॉज़मॉच़ स पनॖपॉर।।
डाॅ रमेश निराश
